القدس

صوت انفجار هزنى كسر جدار الهمس




لما البطل شرف وسألنى إيه القدس




بص ف عينيه بعينين قايدة شرر وشرار




شد القميص قال كفاية ذل ومهانة وعار




بعت القضية ليه زى إللى باع العرض




يومها الكسوف هدنى وعينيه جت ف الأرض




نفضل نقيم علاقات ونقدم اعتذارات




يبقى القتيل مننا ونرفع الرايات




فى شرع مين يا خال شرف العروبة اتهان




دى القدس دى أرضنا ورمز للأديان




يا مسلمين لله بقى هو ده حالنا




نجيب لروحنا العار والذل لعيالنا




ما تقوم يا عم صلاح وتعلم أحفادك




مجد العروبة راح والبركة ف ولادك








راجع لأرضى وأطوف وأقطع قميص اليأس




هأمشى وأدوس ع الخوف يلا بنا يا ألفونس




راجع وهاثبت وجودى فى حد جاى يا ناس




وألفو طلع الكنيسة وهيضرب الأجراس




وأمانة يامّا إن رجعنا زغروتة يا غالية




ولو صابونى برصاصهم زغروتة م العالية




الشمس ما تدفى إلا اللى تحتيها






والأرض ما تحضن إلا اللى يحميها